ഏറെ കാലങ്ങൾക്ക് ശേഷം ഹിറ്റ് മേക്കറായ ജോഷിയുടെ സംവിധാനത്തിൽ ഒരുങ്ങിയ ചിത്രം പൊറിഞ്ചു മറിയം ജോസ് തെലുങ്കിലേക്ക് റീമേക്ക് ചെയ്യാനൊരുങ്ങുകയാണ്. ജോജു ജോർജ്, നൈല ഉഷ, ചെമ്പൻ വിനോദ് എന്നിവരാണ് ചിത്രത്തിലെ മുഘ്യ വേഷങ്ങൾ കൈകാര്യം ചെയ്തിരിക്കുന്നത്.
നിര്‍മ്മാതാക്കളായ അഭിഷേക് അഗര്‍വാള്‍ ആര്‍ട്‌സ് ആണ് തങ്ങളുടെ അടുത്ത പ്രോജക്റ്റ് ആയി ഈ ചിത്രം പ്രഖ്യാപിച്ചിരിക്കുന്നത്. സിനിമയുടെ പ്രീ പ്രൊഡക്ഷന്‍ പുരോഗമിക്കുകയാണെന്ന് നിര്‍മ്മാതാക്കള്‍ അറിയിച്ചു. തെലുങ്ക് പ്രേക്ഷകരെ മുന്നില്‍ കണ്ട് സിനിമയുടെ തിരക്കഥയില്‍ ആവശ്യമായ മാറ്റങ്ങളുണ്ടാകും.
മലയാളത്തില്‍ ജോജു അവതരിപ്പിച്ച കാട്ടാളന്‍ പൊറിഞ്ചുവിനെ തെലുങ്കില്‍ നാഗാര്‍ജുനയാകും അവതരിപ്പിക്കുക എന്ന റിപ്പോര്‍ട്ടുകളുണ്ട്. പ്രസന്ന കുമാറാണ് ചിത്രം സംവിധാനം ചെയ്യുന്നത്. തെലുങ്കിലെ ശ്രദ്ധേയനായ തിരക്കഥാകൃത്തായ അദ്ദേഹത്തിന്റെ സംവിധായകനായുള്ള അരങ്ങേറ്റ ചിത്രമാണിത്.
2019 ഇൽ പുറത്തിറങ്ങിയ ചിത്രം ഏറെ പ്രേക്ഷക ശ്രെദ്ധ നേടിയിരുന്നു. സൗഹൃദവും പ്രണയവും പകയുമെല്ലാം പറഞ്ഞ ചിത്രത്തിന്റെ തിരക്കഥ അഭിലാഷ് എന്‍ ചന്ദ്രന്റേതാണ്. വിജയരാഘവന്‍, ടി ജി രവി, സുധി കോപ്പ, രാഹുല്‍ മാധവ്, സലിം കുമാര്‍, സ്വാസിക തുടങ്ങിയവരും സിനിമയില്‍ പ്രധാന വേഷങ്ങളിലെത്തിയിരുന്നു. അജയ് ഡേവിഡ് കാച്ചപ്പിള്ളിയാണ് ഛായാഗ്രഹണം നിര്‍വഹിച്ചത്. സംഗീതം ഒരുക്കിയത് ജേക്ക്‌സ് ബിജോയ് ആണ്.